Divine Intervention ★★★★★

يد إلهية للفلسطيني ايليا سليمان
زي ما رأفت الميهي عمل في "سمك لبن تمر هندي" لمحمود عبد العزيز ،بيقدم وضع سياسي محتقن جدا علي وشك الانفجار بشكل سيريالي عبثي رمزي ساخر ،وبياخد نفس وجهة النظر أن هذا الوضع من كتر ما هو عبثي مينفعش يتقدم أو يتعالج غير في شكل عبثي كوميدي. وزي سمك لبن تمر هندي (المصري) والكومبارس (السوري) فهو بيقدم النقد أو العرض دا في قصة حب مليانة كبت ،لو قصص الحب دي في دولة غير عربية كان ممكن تلاقي المحبين دول بيبوسوا بعض عالاقل وممكن يكملوا لبعد كدا ،ولكن التلت افلام العربيين دول ليظهروا وبيوضحوا عنصر الكبت دا كجزء أساسي من الحدوتة ،دول حبيبة مش عارفين مش عارفين يبقوا مع بعض ،والتلت افلام دول بيربطوا بين الكبت والاحتقان العاطفي دول والكبت والاحتقان السياسي /الاجتماعي في دولهم.
الفيلم غرقان في الرمزيات ،وغرقان في الاسكتشات/المواقف/ المشاهد الكوميدية احيانا والغريبة احيانا والسخيفة احيانا والمبتكرة دائما.
فيلم يد إلهية درس ،في حاجات كتير:
اولا: التصوير ،ومكان وضع الكاميرا وال shot composition
من اعظم ما رأيت في حياتي ،في اغلب الفيلم الكاميرا مش بتتحرك + أن اماكن التصوير يبدو لي أن واقعية ،بمعني أنها شوارع وأماكن فعلا مش ديكورات استديو أو معمولة مخصوص علشان الفيلم ،وبالتالي مكان وضع الكاميرا وزاوية التصوير عنصر مهم للجانب البصري للفيلم ،و واو! قرارات تصويرية كتير اوي في الجانب دا في الفيلم دا عجبتني بغباء ،لدرجة تخليني ارشح الفيلم دا لأي حد ليه في التصوير أو عايز يبقي سنيماتوجرافر افلام يتفرج عليه علشان يتعلم من شغل الكاميرا اللي فيه
ثانياً: التليفونية Iconic
ودي من جانبين
أ-الفيلم فاهم كويس اوي اوي مفهوم وقوة الأيقونة ،اللي هي صورة أو عنصر بصري بتحمل دلالة أو معني معين عند الناس ،وابسط مثال من ضمن استعمالات الفيلم القوية والكتيرة -والمباشرة- هو اول مشهد فيه خالص -واللي مش عايز أحرقه علشان كان مفاجأة سارة بالنسبالي-
ب-ان الفيلم ذات نفسه فيه شوتات كتيرة ايقونية. عارف لقطة ملك الموت في الختم السابع أو الأم والسيارة في ذا ميرور أو الرقصة في بالب فيكشن؟ صور قوية ومهمة الفيلم بيخلقها و تعلم معاك بعد ما تخلص الفيلم ،الفيلم فيه مجموعة (مش لقطة واحدة) من اكتر اللقطات الأيقونة اللي شفتها مؤقتاً
ثالثا: استعمال الروتين.
الفيلم بيستعمل الروتين بشكل فريد جدا ،مشاهد ومواقف كتير بتتكرر كذا مرة علي مدار الفيلم بشكل روتيني ،ومقصود ،وفريد ،وانا محسيتوش ممل ،واستعماله كان جميل.
الفيلم فيه برضو استعمال /عرض رمزي جميل لفكرة أهمية الفن والخيال كأدوات في مواجهة الاحتلال والأزمات السياسية بشكل عجبني جدا